Fréttabréf haustsins 2021

Kæru nemendur í SK og foreldrar.

Hér eru helstu upplýsingar um starfið okkar í vetur. Við erum mjög spennt að koma aftur til starfa í fína húsnæðinu okkar í Tónhæð og hlökkum til að hitta alla nemendurna okkar.

Kennslan

Kennarar SK eru í stundatöflugerð fram til 26. ágúst og verða í sambandi við sína nemendur og foreldra þeirra til að setja niður hljóðfæratíma vetrarins. Við miðum við að kennsla hefjist skvt. stundaskrá fimmtudaginn 26. ágúst.

Fyrstu dagana gætu tímarnir þó eitthvað færst til á meðan við erum að festa stundaskrána.

Samæfingar

Samæfingar hljómsveitanna eru á sömu tímum og undanfarin ár. Vonandi geta allir mætt á þessum tímum í vetur því góð mæting er undirstaða framfara í samspili.

Æfingatímar er þessir:

A-sveit       mánudagar og fimmtudagar   kl. 15:50 til 16:40.

B-sveit       þriðjudagar og föstudagar   kl. 16:00 til 17:25.

C-sveit       mánudagar og fimmtudagar     kl. 17:00 til 18:25.

Nýnemar byrja ekki á samæfingum fyrr en eftir áramót, því mikilvægt er að hafa náð grunnfærni á hljóðfærið fyrst. Kennarar meta það hvenær nemendur þeirra eru tilbúnir að takast á við samspilið og boða þá á fyrstu samæfinguna.

Þegar nýnemar byrja í samspili fara þeir í A sveitina, en þar eru nemendur á fyrsta og öðru ári að spila saman.

Námsgjöld

Skólagjöld frá 1. janúar 2021 eru kr. 21.602 kr. á önn og hljóðfæraleiga er kr. 4.598 kr. á önn. Skólagjöld innheimtast í gegn um Frístundagátt Kópavogsbæjar. Hægt er að nýta frístundastyrk Kópavogsbæjar á móti námsgjaldinu og verða nánari upplýsingar um greiðslu námsgjalda sendar foreldrum fljótlega.

Kynningarfundur fyrir foreldra nýnema

Þriðjudaginn 7. september kl. 20:00 verður haldinn kynningarfundur fyrir foreldra nýnema. Þar förum við yfir öll helstu atriðin í uppbyggingu starfsins okkar og tónlistarnámi barnanna. Mjög mikilvægt er að foreldrar/forráðamenn nýrra nemenda komi á þennan fund til að kynna sér hvernig starfið er byggt upp og hvernig best er að aðstoð barnið við þetta krefjandi verkefni sem kallast tónlistarnám.

Ef sóttvarnarreglur leyfa verður fundurinn í Tónhæð en annars með fjarfundarsniði.

Kennarar

Hjá Skólahljómsveit Kópavogs starfa fimmtán menntaðir tónlistarkennarar sem leggja sig fram um að koma börnunum ykkar sem lengst á tónlistarbrautinni. Flestir kennaranna eru jafnframt starfandi tónlistarfólk og koma fram á ýmsum tónlistarviðburðum á hverju ári.

Kennarar SK þennan vetur eru.

  • Berglind Stefánsdóttir – flauta
  • Birgir Bragason – rafbassi
  • Carlos Caro Aguilera – málmblástur
  • Dagný Marinósdóttir – flauta
  • Eiríkur Rafn Stefánsson – trompet
  • Halldór Hauksson – meðleikur
  • Eyrún Þóra Sigurjónsdóttir – klarínett
  • Jóhann Björn Ævarsson – horn
  • Jón Halldór Finnsson – málmblástur
  • Kjartan Guðnason – slagverk
  • Margrét Birna Sigurbjörnsdóttir – klarínett
  • Matthías V Baldursson – saxófónn
  • Sigurjón Bergþór Daðason – klarínett
  • Þráinn Hjálmarsson – tónfræði
  • Össur Geirsson – stjórnandi

Vetrarfrí

Vetrarfrí hjá SK fylgja vetrarfríum grunnskólanna í bænum. Fyrra vetrarfríið er dagana 25. og 26. október og það síðara er 17. og 18. febrúar. Engin kennsla er þessa daga.

Starfsdagar

Starfsdagar SK fylgja EKKI starfsdögum grunnskólanna. Þegar starfsdagar eru í grunnskólum, foreldradagar eða aðrir breyttir dagar er kennsla eins og venjulega hjá SK!

Starfsdagar SK eru aðeins tveir á starfstíma skólans, þann 3. janúar og á öskudag, 2. mars.

Helstu tónleikar vetrarins

Það eru tvennir stórtónleikar á hverju ári sem allar hljómsveitirnar okkar þrjár taka þátt í. Fyrstu tónleikar nýnema eru venjulega vortónleikarnir, en við væntum þess að allir nýnemar og foreldrar þeirra mæti á hausttónleikana til að upplifa stemminguna og sjá hvað bíður ykkar á vorönninni.

Hausttónleikar allra sveitanna verða haldnir miðvikudaginn 3. nóvember kl. 19:30.

Vortónleikarnir verða í Háskólabíói sunnudaginn 6. mars kl. 14:00.

Í desember verða A og B sveitir með jólatónleika sína laugardaginn 18. desember.

Vinsamlega takið þessa daga frá fyrir okkur!

Landsmót

Til stóð að halda landsmót A og B sveita í Reykjanesbæ í byrjun október en því hefur nú verið frestað um óákveðinn tíma. Við stefnum þó ótrauð á að taka þátt í mótinu þegar loks verður hægt að halda það og sendum ykkur þá frekari upplýsingar.

Æfingabúðir

Tvennar æfingabúðir eru fyrirhugaðar fyrir B og C sveitir í vetur. Oftast verður farið í Hlíðardalsskóla og gist í tvær nætur. Við leggjum af stað um fimmleytið á föstudegi og komum til bara um þrjúleytið á sunnudegi.

Tónfundir

Tónfundir eru stuttir tónleikar þar sem nemendur fá æfingu í að koma fram og spila fyrir áheyrendur. Það verða tvær lotur af tónfundum hjá okkur í vetur, önnur lotan í lok nóvember/byrjun desember og hin í mars. Allir nemendur SK koma fram á tveimur tónfundum á ári, einum á haustönn og öðrum á vorönn.

Tónfræði.

Nemendur okkar læra almennt sína tónfræði í hljóðfæratímunum. Námsefnið okkar heitir Tónfimi og er ætlast til að nemendur vinni verkefni úr bókinni bæði heima hjá sér og í hljóðfæratímunum.

Undanfarin ár höfum við einnig boðið nemendum sem lokið hafa Tónfimi 3 upp á áfanga í tónfræði sem nefnist Hlustun og greining. Þar ljúka nemendur grunnprófi og miðprófi í tónfræðum.

School Archive

School Archive er umsjónarkerfið okkar og samsvarar Mentor hjá grunnskólunum. Foreldrar geta skráð sig þar inn með íslykli eða rafrænum skilríkjum og notað kerfið til að fylgjast með mætingum barna sinna og verkefnum. Þar er einnig möguleiki á breyta upplýsingum t.d. um heimilisföng og símanúmer.

Þetta er einnig rétta leiðin fyrir foreldra til að boða forföll barna sinna.

Farið inn á https://schoolarchive.is/innskraning/ og veljið „Þjónustugátt forráðamanna“ til að komast inn í kerfið.

Mætingar

Í SK er lögð áhersla á að nemendur mæti samviskusamlega í hljóðfæratíma, samæfingar og á alla aðra viðburði. Fari mæting niður fyrir 80% missir nemandi plássið sitt. Beiðnir um leyfi úr tíma skulu koma frá foreldrum í gegn um School Archive og með eins góðum fyrirvara og hægt er. Miðað er við að tilkynningar berist ekki síðar en þremur klukkustundum fyrir tímann.

Nýtt húsnæði

Við í skólahljómsveitinni erum ótrúlega ánægð með nýja húsnæðið okkar, Tónhæð og erum spennt fyrir starfinu í vetur. Okkur langar að biðja ykkur foreldrana að brýna fyrir börnum ykkar að ganga vel um húsnæðið okkar, nota skóhillur og fatahengi í anddyri, muna að þvo hendur og spritta og ekki skilja eftir rusl á við og dreif heldur nota ruslafötur.

Heimasíðan

Við viljum benda ykkur á að nýta heimasíðuna okkar til upplýsingaöflunar. Við gerum okkar besta til að uppfæra síðuna og á henni er viðburðadagatal sem auðveldar ykkur að fletta upp á viðburðum vetrarins og fá upplýsingar um þá.

Á heimasíðunni má jafnan finna upplýsingar um það sem er á döfinni hjá sveitinni, skoða myndir úr starfinu og fleira og munum við reyna að hafa þar inni nýjustu upplýsingar og fréttir.

Þar er einnig skóladagatalið og viðburðadagatalið þar sem hægt er að fá upplýsingar um komandi viðburði.

Facebook

A, B og C sveitir eru með lokaða hópa á facebook. Þeir hópar er einungis hugsaðir fyrir nemendur og foreldra þeirra.

Að hafa samband

Við höfum oft verið spurð að því af hverju við svörum lítið í símann hér hjá SK en ástæðan er einfaldlega sú að hér er enginn ritari sem getur tekið símann og við erum oftar en ekki upptekin í kennslu eða við önnur störf. Því getur verið erfitt að ná símasambandi til okkar.

Ef þið viljið ná tali af okkur er best að hringja fyrir hádegið því þá höfum við oft tíma til að svara símanum. Síminn okkar er 441 9740.

Verið líka ófeimin við að senda okkur póst á netfangið:

skolahljomsveit@kopavogur.is

Forföll á að boða í gegn um School Archive umsjónarkerfið en ekki í síma eða með SMS eða Facebook skilaboðum.

Þetta fréttabréf var sent á netföng foreldra þeirra nemenda sem ekki eru í byrjaðir í samspili og hafa skráð netfang í School Archive. Látið okkur vita ef þið viljið skrá viðbótarnetföng á póstlistann.

Við hlökkum til samstarfsins í vetur!

Össur og Margrét og allir hinir líka.